من أثنز ..

مرحبا بالجميع واتمنى ان تكونوا بأتم الصحة والعافية … اعتذر عن انقطاعي المتكرر :oops:
والظاهر انه راح تكون بعض كتاباتي في البلوق بالعامية علشان ناخذ راحتنا في الكاتبه شوي :mrgreen:
اكتب لكم الحين من Athens بعد ما وصلت لها بحمد الله وصار لي اسبوع فيها
صراحة مدينة روعه كلها مسطحات خضراء واشجار اتوقع لو ابوسعد يدري عن المنطقة اتوقع يشد لها ببعارينه .. ذا بالاضافة إلى الجو روووعه والحين المطر شغال برا < -- يبي قهركم :P

هاذي الصورتين صورتها بالجوال الساعة 6 الصباح من يوم الاحد 6-11
اول مره اشوف قوس قوزح واضح حتى الشباب الي هينا يقولون ما سبق انهم شافوا :roll:
لمشاهدة الصورة اضغطوا على الروابط:
الصورة الأولى
الصورة الثانية

الان بعرض الصور حسب التسلسل في الرحلة ومعليش الصور اغلبها تصوير مو واضح ولا احترافي لانها بالجوال وغير كيذا وانا مستعجل .. ذي الصورة اول ما وصلت لباريس ومتجهين لصالات الترانزيت
لمشاهدة الصورة
بعد ما وصلت لصالة الركاب المواصلين وعرفت مكان بوابتي كان معي تقريباً وقت 4 ساعات ونص على الإقلاع لواشنطن ، وانواع الفرفره في المطار الظاهر ما خليت محل ما دخلته المشكله الناس تشتري وانا اتفرج 8) كنت بشتري مجسمات صغيره اعجبتني لبرج ايفيل لكن راح تتعبني كل شوي في التفتيش وشنطة اللاب توب صغيرة بعد ، المهم دخلت محل صغير فيه اشياء خفافي كروسون وعصيرات وغيره وطلع الي يشتغل فيه عربي ووحده عربية قعدت اسولف معهم شوي سألتهم اذا فيه مكان ممكن اصلي فيه قالوا لي لا مافيه لكن صل عادي في اي مكان ، المهم اخذت منهم كروسون ومويه وبسكوت وطلعت
بعد ما اكلتها وخلصت قمت افرفر مره ثانيه 8O
المهم رحت دورة المياة واول ما دخلت حصلت على المغاسل مصحف :|
قلت في نفسي حلو اكيد ذا حق مسلم اذا طلع نصلي انا وياه
خلصت وانتظرت برا شوي الا طلع واحد لبناني شفته من البداية لكن ما ارتحت له قلت له لو سحمت القرآن الي كان على المغاسل لك
قالي وهو نفسه في خشمه وينافخ ليش هو فيه قرآن
سألته طيب فيه مصلى قريب هينا ؟ عصب زيادة
طلع مسيحي ههههههه :lol:
تركته ورحت امشي شوي الا وشفت واحد جاي من جهة دورة المياة ومعة كيس مرسوم عليه شعار قناة الجزيرة قلت له القرآن الي كان على المغاسل لك قالي ايه
بغيت احبه :oops:
سألته قلت له ما ادري فيه مصلى هينا ؟
قالي لا صلي في اي مكان عادي
قلت طيب وين اتجاه القبلة
قالي عادي صلي في اي إتجاه اينما تولوا وجوهكم
هينا عرفت انه ما عنده سالفه :mrgreen:
طلع مراسل للجزيرة تركته ورحت
دخلت محل حق كتب وروايات ومجلات المشكله كله بالفرنسي
وانواع القراءة الي يشوفني يقول الولد ثقافته فرنسيه
المهم وانا ادور طاحت عيني على كتاب والظاهر انه تمت ترجمته لكذا لغة
الكتاب كان عن مشكلة رانيا الباز :twisted:
هاذي صورة الكتاب
بعد ما خلصت فرفره رحت قعدت في مكاني إلى ان حان وقت الإقلاع وهذا المسار الي مشيت فيه إلى الطيارة يفتح النفس مو مثل مطار جدة
لمشاهدة الصورة
الرحلة لواشنطن كانت على الخطوط الفرنسية طبعاً وخدماتهم ممتازه جداً..
بعد ما وصلت لمطار واشنطن الحمد لله تسهلت امور التفتيش والإجرائات توقتعها بتكون مقعده لكن الحمد لله تساااهيل
كان في استقبالي بمطار واشنطن الملحقية الثقافيه استقبلوني لحالي لاني على خطوط غير
واول ما طلعت من المطار وفي طريقنا للسيارة جا مطر وجهي خير عليهم :mrgreen: بس بعدين فهمت انه كل يوم نفس الوقت ذا يجيهم مطر :oops:
المهم توجهنا للفندق وهاذي صورة الفندق
الفندق كان مليان طلاب سعوديين وواغلبهم حبوبين وفيهم دلووخ واحد اضمن انه جاي من البر دايركت وواحد سمعته يغني كسرات الله يستر عليهم بس ويوفقهم في دراستهم ..

الوصول لوشنطن كان يوم الخميس العصر
الجمعة الصباح الساعة 9 جت سيارتين فان من المحلقيه وركبوا فيها كل الطلاب والطالبات
وصلنا الملحقية ورحبوا فينا وبدأت المحاضرات إلى الساعة 1 الظهر ورحنا نصلي الجمعة في مسجد الملحقية
بعدها قالوا لنا السفارة كل جمعة تسوي غدا ولازم تروحون طبعاً الشباب ما صدقوا خبر وجري على السفارة :P
دخلنا السفارة بعد ما تفتشنا واخذوا جوالاتنا دخلنا على طول على البوفيه
وكان السفير الامير تركي الفيصل موجود
تغدينا وخلصنا ورجعنا للمحلقية وجانا الملحق الثقافي الدكتور مزيد المزيد وعطانا محاضره
بعدها استلمنا الشيكات والضمانات الماليه للجامعات والضمان الصحي وكل واحد قابل مشرفه الدراسي
انتهينا من المحلقيه وكانت السيارات تحت تتنظر الطلاب فيه طلاب راحوا الفندق وانا منهم والسيارة الثانيه راحوا يتمشون في مول
نمت في الفندق وثاني يوم كان اقلاعي من مطار دالاس الساعة 12.30 على مطار كولومبوس بأهايو
وعاد كانوا في استقبالي الشباب الله يعطيهم العافيه الاخوان عبدالمجيد وعثمان وعبدالله واحمد ماقصروا خبطوا مشوار 120 كيلو لكولومبوس
هاذي تقريباً معظم تفاصيل الرحلة واذا فيه شيء نسيته راح اكتبه في بوست ثاني ..

18 يونيو, 2006